🐇 જોડકણા 🐒

⏩ જૈન બાળપોથી    Download 

બાળ જોડકણાં 

👉 ગળે કાંઠલો કાળો છે, 

બહુ રંગે એ લીલો છે ભાઇ, 

લાલ ચાંચ વાળો છે, 

લીલાં મરચાં એ બહુ ખાય છે  ભાઇ --- પોપટ 

👧 ટહુકતી એ આંબા ડાળે, 

બચ્ચાં ઉછેળતી એ કાગના માળે, 

કાળા રંગે બહુ કામણગારી, 

મીઠાં ગીત ગાતી અલગારી. --- કોયલ 

👨 મામાનું ઘર કેટલે 

દિવો બળે એટલે,

દિવો મે તો દિઠો 

મામો લાગે મીઠો 

મામી મારી ભોળી 

મીઠાઇ લાવે મોળી 

મોળી મીઠાઇ ભાવે નહી 

રમકડા કોઈ લાવે નહી. 

👩 એક હતી શકરી 
એણે પાળી બકરી 
શકરી ગઈ ફરવા 
બકરી ગઈ ચરવા 
ફરીને આવી શકરી 
ભાળી નહી બકરી 
રડવા લાગી શકરી .. એં .. એં..એં.. 
આવી પહોંચી બકરી .. બેં.. બેં.. બેં .. 

👸 પા ! પા ! પગલી
ફૂલની ઢગલી
ઢગલીમાં ઢેલડ
જીવે મારી બેનડ !
પા ! પા ! પગલી
બાગમાં બગલી
બગલી બોલાવે
ડોક ડોલાવે
નીર ઝુલાવે
તીર તળાવે
પા ! પા ! પગલી 

👮 નાજુક ડગલી
ડગલી ભરતાં
દડવડ દડતાં
બેની મારી પડતાં !

👲 પા ! પા ! પોઢણ
આભનાં ઓઢણ
ઓઢીને ઊંઘો
સોણલાં સૂંઘો
ઝટ પાછાં જાગો
પ્રભુ પાસે માંગો !

💃 પા ! પા ! પોપટ
લીલો લટપટ
લળીલળી ચાલે
સરોવરની પાળ્યે
પાંખો પલાળે
કાંઠલે કાળે
પ્રેમે બેની પાળે.

👶 નીર નીતરિયાં
ઊંડાં ઊતરિયાં
નાવણ કરિયાં
બેડલાં ભરિયાં. 

👭 પા ! પા ! પૂનમ
તારા ટમટમ
ચાંદો ચમચમ
રાત્રી રમઝમ
સાગર ઘમમમ !

👬 પા ! પા ! પોળી
ધીમાં ઝબોળી
બોળીને ખાજો !
ગલુ ભાગ દેજો !   

👼 પા ! પા ! પડિયાં
થોડુંક રડીયાં
આંસુડાં દડીયાં . 

👩 ભાઇ સાથે લડીયાં
ભાઇ ભરે બકી
જાણે ચકો-ચકી. 

👨 પા ! પા ! પાલર
ઝૂલે છે ઝાલર
ઝાલર જડીયો
બેનીબાનો ચણિયો
જાણે નાનો દરિયો ! 

💇 પા ! પા ! પ્રભુજી !
એક જ અરજી
ઝટ દો પગ જી !
પગે ઝાડ ચડશું
પહાડે રખડશું
વેરી સાથે લડશું
મા કાજે મરશું,

ફરી અવતરશું !

   – સં. ઝવેરચંદ મેઘાણી (‘સોના-નાવડી’ માંથી સાભાર.)